தேங்காய் எண்ணெய் உற்பத்திக்காக 200 மில்லியன் தேங்காய்களுக்குச் சமமான தேங்காய் சொட்டுக்களை இறக்குமதி செய்ய அமைச்சரவை அங்கீகாரம்!
உள்நாட்டுத் தேங்காய் உற்பத்தியில் ஏற்பட்டுள்ள பற்றாக்குறையைச் சமாளிக்கும் விதமாக, சுமார் 200 மில்லியன் தேங்காய்களுக்குச் சமமான கொள்ளளவு கொண்ட தேங்காய் சொட்டுக்களை இறக்குமதி செய்வதற்கு அமைச்சரவை ஒப்புதல் அளித்துள்ளது.
நாட்டில் தேங்காய் உற்பத்தி போதுமானதாக இல்லாத காரணத்தினால், உள்நாட்டு நுகர்வுச் சந்தையில் தேங்காய்க்குத் தட்டுப்பாடு நிலவி வருகிறது. இதனைச் சரிசெய்யும் நோக்கில், தேங்காயை மூலப்பொருளாகக் கொண்டு இயங்கும் தொழிற்சாலைகளுக்குத் தேவையான தேங்காய்ச்சில் மற்றும் அது சார்ந்த பிற மூலப்பொருட்களை இறக்குமதி செய்ய அரசு முடிவு செய்துள்ளது. தற்போது நடைமுறையிலுள்ள சட்டதிட்டங்களுக்கு உட்பட்டு, சம்பந்தப்பட்ட தரப்பினருடன் கலந்து ஆலோசித்து, விரைவாக இறக்குமதி செய்வதற்கான வழிமுறைகளை உருவாக்க கைத்தொழில் மற்றும் தொழில் முயற்சி அபிவிருத்தி அமைச்சின் செயலாளருக்கு ஜனவரி 27ஆம் தேதி நடைபெற்ற அமைச்சரவைக் கூட்டத்தில் அறிவுறுத்தப்பட்டது.
இதனையடுத்து, விவசாயத் திணைக்களம், தெங்கு ஆராய்ச்சி நிறுவனம், தெங்கு அபிவிருத்தி அதிகாரசபை, தாவரத் தொற்றுக்காப்பு சேவை மற்றும் இலங்கை தர நிர்ணய கட்டளைகள் நிறுவன் ஆகியவை இணைந்து, குளிரூட்டப்பட்ட தேங்காய் சொட்டு, உலர்ந்த தேங்காய் சொட்டுத் துண்டுகள் (கொப்பரை அல்லாதது), தேங்காய் பால், தேங்காய்ப் பால்மா மற்றும் பதப்படுத்தப்பட்ட தேங்காய்ப் பூ போன்றவற்றை இறக்குமதி செய்வதற்கான வழிகாட்டுதல்களைத் தயாரித்து சமர்ப்பித்தனர்.
இந்த வழிகாட்டுதல்களின்படி, 200 மில்லியன் தேங்காய்களுக்குச் சமமான தேங்காய் சொட்டு சார்ந்த உற்பத்திகளையும், தேங்காய் எண்ணெய் உற்பத்திக்குத் தேவையான உலர்ந்த தேங்காய் சொட்டுத் துண்டுகளையும் (கொப்பரை அல்லாதது) இறக்குமதி செய்ய நடவடிக்கை எடுப்பதற்கு, கைத்தொழில் மற்றும் தொழில்முயற்சி அபிவிருத்தி அமைச்சர் மற்றும் பெருந்தோட்டம் மற்றும் சமூக உட்கட்டமைப்பு வசதிகள் அமைச்சர் ஆகியோர் இணைந்து சமர்ப்பித்த யோசனைக்கு அமைச்சரவை ஒப்புதல் அளித்துள்ளது.
இந்த நடவடிக்கையின் மூலம், உள்நாட்டில் தேங்காய் எண்ணெய் உற்பத்தி அதிகரித்து, சந்தையில் நிலவும் தட்டுப்பாடு குறையும் என்று எதிர்பார்க்கப்படுகிறது. மேலும், உள்நாட்டுத் தெங்கு உற்பத்தியை அதிகரிக்கவும் இது வழிவகுக்கும் என்று நம்பப்படுகிறது.